Hier begunt oes verhaal

We leeft in een tied die rap veraandert. 
Een wereld vol prikkels, verwachtings en beweging, waorin veul vraogd wordt van kinder, olders en van oes. 

Dat zie en vuul we elke dag. 
In wat er op oes ofkomp, maor ok in de vraogen die dertoe doet. 
Hoe zörg we dat elk kind kind metandoen kan? 
Hoe blief we dichtbij? 
En hoe zörg we derveur dat kinder niet allent kennis ontwikkelt, maor ok feduzie, rek en richting? 

Bij CKC Drenthe begeleid we kinder niet allent in de wereld van nou. 
We helpt ze gruien tot gelukkige, zölfstandige en zölfbewuste wereldburgers, die bijdraagt an een weerde(n)volle en duurzame samenleving.  
Daor begunt oes verhaal. 

We kiekt niet eerst naor systemen of structuren, maor naor kinder. 
Naor wel ze bint, wat ze neudig bint en hoe ze gruit – elk op een eigen wieze en altied in relatie tot aandern. 
Want een kind gruit niet allennig. 
In verbinding met aandern en in een betiekenisvolle umgeving ontdekt een kind wel het is en wat het kan. 

Oeze kindcentra bint plaotsen waor kinder zuch veilig weet, en waor ze weet dat ze zien en heurd wordt. 
Waor zij ervaart dat ze derbij heurt, gruien en leren mucht – ok wat nog stoer is. 
Waor leren meer is as presteren: het is ontdekken, verwondern en samen leven. 

Daorum wark wij an rieke speul- en leerumgevings, waorin basisvaardigheden samengaot met creativiteit, beweging, burgerschap en spel. 
Umgevings waorin leren betiekenis kreg, umdat ze verbunden bint met het echte leven.  

Wij doet dat niet allennig. 
In de maande met olders, verzörgers en partners vörm we de gemienschap rond het kind. 
Met mekaar blief we zuken naor wat dizze kinder, dizze groepen en dizze tied van oes vrag. 

In alles waw doet is oeze identiteit vuulbaar: open, warm en verbindend, worteld in geleuf, hoop en liefde. 
Dat ziew weerum in hoe aw met mekaar umgaot, hoe aw verantwoordelijkheid nimt en hoe aw  ruumte maakt veur elkeniens ontwikkeling. 

Dit koersplan gef richting en ruumte. 
Richting as mandielig kompas veur wel aw weden wilt en wat aw belangriek vindt. 
Ruumte as vertrouwen um daor, in de praktijk, betiekenisvol naor te handeln. 

Zo bouw we met mekaar wieder. 
An kindcentra waor kinder zuch ontwikkeln kunt. 
Met professionals die leren blieft. 
An een organisatie die stevig stiet in een wereld die veraandern blef. 

Met de ogen lös veur wat neudig is. 
Met een warm hart veur elk kind. 
En met de overtuging dat grui begunt waor aj vuult: ‘hier mag ik weden’.